Թուրքիա- Emporio Armani

http://tert.am/am/news/2011/10/16/emporioarmani/
Թուրքիայում Emporio Armani բրենդի հագուստ կրելը հայկական քարոզչություն է համարվում
18:15 • 16.10.11

Թուրքիայում լույս տեսնող «Թարաֆ» օրաթերթի հոդվածագիր Ռոնի Մարգուլիսն իր «Արմանին հայ է» խորագրով հոդվածում մի զավեշտալի պատմություն է ներկայացնում այն մասին, թե ինչպես 3 թուրքեր ձերբակալվել և դատարանի առջև են կանգնել Emporio Armani աշխարհահռչակ բրենդի հագուստ կրելու համար: Նրանց մեղադրել են այդ բրենդի միջոցով հայկական քարոզչությամբ զբաղվելու համար:

Իր հոդվածում Մարգուլիսը կոնկրետ անուններ, ամսաթվեր չի նշում, սակայն վստահեցնում է` որքան էլ անհավանական է թվում իր պատմությունը, այն բացարձակ ճշմարտություն է:

«Թարաֆի» հոդվածագիրն իր պատմությունն սկսում է դատարանում կասկածյալների պաշտպանական ելույթներից` նշելով, որ ամբաստանյալները դատարան էին բերվել ձեռնաշղթաներով:

Առաջին կասկածյալ.

«Ես Ստամբուլում շրջելիս` տոնավաճառներից մեկում գնեցի Armani ապրանքանիշի շապիկ և սպորտային տաբատ: Այնուհետև արձակուրդս անցկացնելու նպատակով գնացի Ավշա կղզի: Մեկ շաբաթ էր` կրում էի այդ հագուստը: Սակայն մի օր մի մանրավաճառ հարցրեց. «Ինչո՞ւ ես այդ հագուստը կրում», և ինձ տարան ոստիկանական բաժանմունք, որից հետո բերեցին այստեղ: Երբեք չեմ մտածել, որ նման ձևով քարոզչություն եմ անում: Ես հարգում եմ պետությանը, ես անմեղ եմ»:

Երկրորդ կասկածյալ.

«Ես ցուցմունք եմ տվել ժանդարմերիայում: Վերնաշապիկը գնել եմ ոչ թե Չայջը Օմերից, այլ նրա եղբորից` Իբրահիմից: Ինձանից բացի ուրիշներն էլ են գնել այդ ապրանքանիշի շապիկներ և տաբատներ: Բացարձակապես ետին միտք կամ վատ նպատակներ չեմ ունեցել: Բացի այդ, մյուս կասկածյալներին չեմ ճանաչում: Ես ընտանիքիս հետ գնացել էի Ավշա կղզի արձակուրդս անցկացնելու: Մյուս կողմից այդ ապրանքանիշը հայտնի իտալական բրենդ է: Ես մոդային հետևելով եմ դա գնել: Իմ դեմ առաջադրված մեղադրանքները չեմ ընդունում»:

Երրորդ կասկածյալ.

«Այո, խոստովանում եմ, շապիկն ինձ է պատկանում: Դա ինձ մայրս է նվիրել, որովհետև շատ հայտնի ապրանքանիշ է: Ես ոչ մի մեղք էլ չեմ գործել»:

Մարգուլիսը գրում է, որ մեղադրյալների գործին կից ոստիկանական փաստաթղթում նշված է հետևյալը. «Հայկական քարոզչությամբ զբաղվելու մեղադրանքով կասկածյալները բերման են եթարկվել տարբեր վայրերից: Նրանց շապիկների վրա գրված արտահայտություններն ուսումնասիրվել են փորձագետների կողմից: Իսկ կասկածյալները հարցաքննվել են առանձին-առանձին»:

«Թարաֆի» հոդվածագիրը նշում է` քանի որ «հայկական քարոզչությամբ զբաղվելը» շատ լուրջ հանցագործություն է, կասկածյալներին դատարան էին բերել ձեռնաշղթաներով:

«Կցանկանայի այս դեպքի վրա հրավիրել իրավաբան ընթերցողների ուշադրությունը: Ի՞նչ է նշանակում զբաղվել հայկական քարոզչությամբ: Օրինակ, իմ ընկեր Երվանդը շատ լավ ջութակ է նվագում: Մի՞թե սա նշանակում է զբաղվել հայկական քարոզչությամբ: Ըստ իս` կարող է լինել: Այնպես որ, ուշադիր լինենք»,- հեգնում է Մարգուլիսը` ավելացնելով. «Թուրքական արդարադատությունը, պարզելու համար` արդյոք Emporio Armani գրությամբ շապիկ կրելը հանցագործություն է, թե ոչ, դիմեց փորձագետների օգնությանը: Թարգմանիչներից կազմված փորձագիտական խումբը հաստատեց, որ Emporio Armani նշանակում է հայկական կայսրություն: Իսկ մեղադրյալներին դատապարտեցին ցմահ բանտարկության: Գիտեմ` կլինեն մարդիկ, որ չեն հավատա իմ այս պատմությանը: Սակայն շտապեմ վստահեցնել, որ ողջ այս պատմությունը բացարձակ ճշմարտություն է` բացառությամբ դատարանի` ամբաստանյալների նկատմամբ կայացրած դատավճռից»: