les rélations entre République de l'Arménie et de l'Artsakh

http://www.armar.am/?p=58104

Արմենակ Աբրահամյան.‹‹Ինչո՞ւ ենք սպասում››
Դեկտեմբեր 13, 2010թ. 10:00
‹‹Մենք կոչ ենք անում Հայաստանի Հանրապետության իշխանություններին ճանաչել Արցախի Հանրապետության անկախությունը: Այդ քայլով մենք կլռեցնենք Ադրբեջանին, թույլ չտալով հայտարարարել, թե ընդունում է Արցախի ինքնորոշման իրավունքը`Ադրբեջանի տարածքում››,- ArmAr.am էլեկտրոնային օրաթերթի հետ հեռախոսազրույցում ասաց Արևմտյան Հայաստանի Հայերի Ազգային Խորհրդի նախագահ Արմենակ Աբրահամյանը:

Ա. Աբրահամյանի համոզմամբ, Հայաստանի ու Արցախի միավորման համար նախ պետք է, որ ճանաչված լինի Արցախի անկախությունը: ‹‹Քանի դեռ Արցախը չի անկախացել մենք իրավունք չունենք բարձրացնել միավորման խնդիր: Նախ անկախացում, որից հետո, մյուս փուլում`միացում››: Արցախի անկախության ճանաչումից հետո միայն երկու հայկական կողմերը կարող են պայմանավորվել միավորման շուրջ: Մեխանիզմներից մեկն էլ, ըստ Աբրահամյանի, կարող է լինել հետևյալը. ‹‹Արցախի Հանրապետության խորհրդարանը միավորման հատուկ որոշումով դիմում է Հայաստանի Հանրապետությանը››:

Արձագանքելով ՀՀ նախագահ Սերժ Սարգսյանի այն հայտարարությանը, թե «Ադրբեջանի կողմից նոր ռազմական արկածախնդրության դեպքում Հայաստանն այլ ընտրություն չի ունենա, քան ճանաչել Լեռնային Ղարաբաղի Հանրապետությունը եւ ապահովել նրա բնակչության անվտանգությունը բոլոր հասանելի միջոցներով»,- Արմենակ Աբրահամյանն ասաց. «Այսօր Արցախը գտնվում է պատերազմի մեջ: Ես չգիտեմ մի երկիր, որն ամեն օր իր վրա է ընդունում հարևան երկրից եկող ռազմական հարվածները, բայց չի համարում, որ գտնվում է պատերազմի մեջ: Իսկ ի՞նչ է սա, եթե ոչ պատերազմ, եթե կան զոհեր, եթե ամեն օր Ադրբեջանի բանակը հայոց բանակի վրա կրակ է բացում, զոհվում են հայ զինվորներ, ու այսպես 15 տարի շարունակ… Ադրբեջանական կողմն օգտագործում է տարբեր տրամաչափի հրազենային տեխնիկա, ուրեմն, ի՞նչ է սա, եթե ոչ պատերազմ: Բայց գտնվելով պատերազմական վիճակի մեջ, մենք դեռ շարունակում ենք չճանաչե՞լ Արցախի անկախությունը: Հարց է առաջանում, ինչո՞ւ ենք սպասում: Հայաստանի Հանրապետության նախագահ պարոն Սերժ Սարգսյանը օր առաջ պետք է ճանաչի Արցախի Հանրապետության անկախությունը: Միայն այդ կերպ մենք կկարողանանք լուծել մեր անվտանգության հարցերը: Իսկ ճանաչումից հետո Արցախի Հանրապետությունը, արդեն որպես ճանաչված պետություն, միջազգային ատաններում կծավալի իր դիվանագիտական ակտիվ գործունեությունը»:

Արևմտյան Հայաստանի Հայերի Ազգային Խորհրդի նախագահ Արմենակ Աբրահամյանն անընդունելի է համարում շրջանառվող այն միտքը, թե ազատագրված տարածքները պետք է պահել Լեռնային Ղարաբաղի անվտանգությունից ելնելով: «Դա սխալ միտք է, այդ տարածքները մեր հայրենիքի մի մասն են կազմում, ուրեմն, նախ հե′նց դրա համար պետք է պատկանեն հայ ժողովրդին: Եվ հետո, ազատագրված տարածքների պահպանմամբ ո′չ միայն Արցախի, այլ, ընդհանրապես, Հայոց պետականության անվտանգության պահպանման խնդիրն է լուծվում»:

ArmAr.am