Աբդուլա Գյուլ. «Բարաք Օբաման այժմ ավելի լավ է տեղեկացված»
Բարաք Օբամա եւ Աբդուլա Գյուլ, Անկարա, 6 ապրիլի, 2009
24.04.2009
Հեղինե Բունիաթյան
Թուրքիայի նախագահ Աբդուլա Գյուլը այսօր ակնարկել է, որ չի կարծում, թե Միացյալ Նահանգների նախագահ Բարաք Օբաման ապրիլքսանչորսյան իր ուղերձում Օսմանյան կայսրությունում հայերի զանտվածային կոտորածը կորակի որպես ցեղասպանություն:
«Ֆրանսպրես» գործակալության վկայությամբ` Գյուլը թղթակիցների հետ զրույցում ասել է, թե ապրիլի սկզբին Օբամայի Թուրքիա կատարած այցի ժամանակ «շատ լայնորեն» քննարկել է նրա հետ տվյալ հարցը, եւ Միացյալ Նահանգների նախագահը «այժմ ավելի լավ է տեղեկացված»:
Թուրքիայի նախագահի կանխատեսմամբ, Բարաք Օբաման իր ուղերձում «կխրախուսի բարի մտադրություններ հետապնդող մեր բոլոր աշխատանքները»` Երեւանի եւ Անկարայի միջեւ շարունակվող բանակցությունները:
Վաշինգտոնը բազմապատկել է ջանքերը` տարածաշրջանային խնդիրների լուծմանը նպաստող միջավայր ստեղծելու համար, - ասել է Թուրքիայի նախագահը եւ հավելել, թե Հայաստանի եւ Թուրքիայի միջեւ ձեռք բերված համաձայնությունը կօգնի Թուրքիայի դաշնակից Ադրբեջանին` Հայաստանի հետ ունեցած տարաձայնությունների հարցում:
«Ես վերջին օրերին խոսել եմ Ադրբեջանի նախագահ Իլհամ Ալիեւի հետ, եւ մենք համաձայնել ենք, որ այն, ինչ կատարվում է , արվում է ի շահ մեր երկու երկրների` Թուրքիայի եւ Ադրբեջանի», - ասել է Աբդուլա Գյուլը:
http://www.azatutyun.am/content/article/1615341.html